२० असोज, काठमाडौं । नेकपा एमालेका अध्यक्ष झलनाथ खनालले सरकारविरुद्ध शुक्रबार भएको प्रदर्शन रिहर्सल मात्र भएको बताउनु भएको छ ।

युवा संघ नेपालद्धारा शनिबार राजधानीमा आयोजित शुभकामना आदान प्रदान कार्यक्रममा खनालले शुक्रबारको प्रदर्शनलाई पखेटा फटफटाएको संज्ञा दिनुभयो । ‘हिजो आफ्ना पखेटाहरु कस्ता छन्, पखेटा पूरा फिजाएर उड्न सकिन्छ कि सक्छौं कि सक्दैनौं भनेर हिजो एमालेले पखेटा फटफटाएर हेरेको मात्र हो’ उहाँले भन्नुभयो-’जब एमाले साच्चिकै पखेटा फिजाएर उड्न थाल्छ, त्यति बेला यो सरकारको सातो उड्छ र माओवादीले सत्ता छाड्नै पर्ने हुन्छ ।’

माओवादी अहिले पनि विपक्षी दललाई छलछाम र भुलभुलैयामा पारेर अगाडि बढ्ने दाउमा रहेको भन्दै उहाँले वर्तमान सरकारको बहिर्गमन नहुँदासम्म कुनै सहमति हुन नसक्ने उहाँको भनाई छ ।

सहमतिकासाथ सरकारले सहजरुपमा बहिर्गमन नमान्ने हो भने आफ्नो पार्टीले कडाभन्दा कडा आन्दोलन गर्ने चेतावनी दिनुभयो ।